Infórmanos o Presidente da Xunta, Alberto Núñez Feijóo, a través dos medios de comunicación, a toma en consideración dunha serie de medidas dirixidas aos empregados públicos, entre a que destaca pola súa repercusión pública a suspensión do coñecido "Plus de Altos Cargos".

A CIG-Autonómica quere deixar constancia de que o Presidente da Xunta non suprime o Plus, senon que só o suspende temporalmente. Inda así, é ben posíbel que o Plus, aprobado por Lei, poida seguir sendo cobrado polos seus beneficiarios mediante resolución xudicial, dependendo en boa medida da vontade dos seus perceptores.

Para a CIG que, durante anos, levamos adiante manifestacións, concentracións, denuncias públicas... e rematamos coa presentación no Parlamento dunha Iniciativa Lexislativa Popular que foi rexeitada polo PP e PSOE, non abonda.

As empregadas e empregados públicos esiximos a supresión  inmediata e definitiva deste plus. Hai que tildar esta medida coma demagóxica, ao igual que o resto, e destacamos que os verdadeiros problemas de fondo son outros. Unha medida que pretende ser unha xustificación moral dos recortes que se lle piden ao colectivo de empregados públicos. E consideramos un insulto que se poña ao mesmo nivel o “sacrificio” da renunica temporal ao plus salarial de altos cargos que, por exemplo, a supresión de complemento por enfermidade ou accidente non laboral.

Nota remitida aos medios